వర్షాకాలం.. బయ్యర్లకు ఆఫర్ల గాలం..
Real estate developers are promoting “Buy Now, Pay Later” and flexible payment schemes during the monsoon season to boost sales before the festive period.
* బై నౌ.. పే లేటర్ స్కీమ్ ల వెల్లువ
వర్షాకాలంలో సాధారణంగా మందగించే రియల్ ఎస్టేట్ విక్రయాలకు ఊపిరిపోసేందుకు కొందరు ప్రముఖ బిల్డర్లు కొత్త వ్యూహానికి తెర తీశారు. దసరా, దివాళీ పండుగల సీజన్ రాక ముందే కొనుగోలుదారులను ఆకట్టుకునేందుకు 'బై నౌ, పే లేటర్' లేదా ఫ్లెక్సీ పేమెంట్ స్కీమ్లను భారీగా ప్రచారం చేస్తున్నారు. ఈ ఫ్లెక్సీ-పేమెంట్ విధానంలో ఇల్లు బుక్ చేసుకునే సమయంలో కొనుగోలుదారులు ఆస్తి విలువలో కేవలం స్వల్ప మొత్తాన్ని (5% నుంచి 10% వరకు) ముందస్తుగా చెల్లిస్తే సరిపోతుంది. మిగిలిన మొత్తాన్ని నిర్మాణం పూర్తయ్యే దశల ఆధారంగా లేదా ప్లాట్/ఫ్లాట్ హ్యాండోవర్ (స్వాధీనం) సమయంలో చెల్లించే వెసులుబాటు కల్పిస్తారు. ప్రస్తుత ధరల వద్దే ఇంటిని లాక్ చేసుకుని, పూర్తి డబ్బు సర్దుబాటు చేయడానికి తగినంత సమయం లభించడం వల్ల కొనుగోలుదారులకు ఇది ఒక మంచి అవకాశంగా అనిపిస్తుంది.
వర్షాకాలంలోనే ఎందుకు?
సాధారణంగా వర్షాకాలంలో రియల్ ఎస్టేట్ లావాదేవీలు కొంత తగ్గుతాయి. దీనిని అధిగమించడానికే డెవలపర్లు ఈ పథకాలను మళ్లీ తెరపైకి తెచ్చారు. పండుగల సీజన్ నాటికి ప్రాపర్టీ ధరలు పెరిగే అవకాశం ఉంది. ధరలు పెరిగితే చాలామంది కొనుగోలుదారులు బడ్జెట్ దాటి వెనకడుగు వేస్తారు. అందుకే ప్రస్తుత ధరల వద్దే కస్టమర్లను లాక్ చేయడం బిల్డర్లకు ప్రయోజనకరంగా మారింది.
రాబోయే పండుగల సీజన్కు ముందే విక్రయాల్లో ఊపు తెచ్చేందుకు ఈ అడ్వర్టైజింగ్ క్యాంపెయిన్లు తోడ్పడుతున్నాయి. జేఎల్ఎల్ నివేదిక ప్రకారం, ఈ స్కీమ్లు ప్రధానంగా లగ్జరీ/ప్రీమియం హౌసింగ్ విభాగంలో (రూ.5 కోట్ల నుంచి రూ.15 కోట్ల మధ్య ఉండే ఇళ్లు) బాగా పనిచేస్తున్నాయి. ఈ విభాగంలోని కొనుగోలుదారులు తమ పెట్టుబడులను ఒకేసారి కాకుండా విడతలవారీగా చెల్లించడానికి ఎక్కువ మొగ్గు చూపుతారు.
అయితే రూ.15 కోట్లకు పైబడిన అత్యంత ఖరీదైన ఆస్తుల కొనుగోలుదారులు వ్యాపార లేదా ఇన్వెస్ట్మెంట్ ఫండ్స్ ద్వారా నేరుగా చెల్లింపులు జరుపుతారు కాబట్టి, వారిపై ఈ స్కీమ్ల ప్రభావం తక్కువ. ప్రస్తుతం రుస్తుంజీ గ్రూప్, హౌస్ ఆఫ్ హిరానందాని, కల్పతరు, రేమండ్ రియల్టీ వంటి దిగ్గజ బిల్డర్లు ముంబైలో ఈ ఆఫర్లను విస్తృతంగా ప్రచారం చేస్తున్నారు.
డెవలపర్ల ప్రకారం.. ఈ ఫ్లెక్సీ పేమెంట్ ఆఫర్లు ఇవ్వడం అంటే కంపెనీలు ఆర్థిక ఇబ్బందుల్లో ఉన్నాయని అర్థం కాదని చెబుతున్నారు. మెజారిటీ లిస్టెడ్ బిల్డర్లు ఇప్పటికే తమ వార్షిక సేల్స్ టార్గెట్లలో దాదాపు 80% సాధించారు. కాబట్టి ఇది డిస్ట్రెస్ సేల్ (సమస్యల్లో ఉండి అమ్మడం) కాదు; మార్కెట్లో ఇన్వెంటరీని త్వరగా ఖాళీ చేయడానికి మరియు కొత్త ఎంక్వైరీలను రాబట్టడానికి ఉపయోగిస్తున్న ఒక మార్కెటింగ్ సాధనం మాత్రమే.
ఫ్లెక్సీ-పేమెంట్ స్కీమ్ల వల్ల వడ్డీ లేదా ఫైనాన్సింగ్ ఛార్జీల రూపంలో కొంతదనపు భారం పడుతుందని కొనుగోలుదారులకు తెలుసు. అందుకే మెజారిటీ కస్టమర్లు సాధారణ చెల్లింపు విధానాలనే ఎంచుకుంటారు. అయితే, తమ ఆర్థిక ప్రణాళికలకు తగ్గట్టు వెసులుబాటు కోరుకునే వారికి ఇది చక్కని అవకాశం, అని తెలంగాణ బిల్డర్స్ ఫెడరేషన్ ప్రెసిడెంట్ సీహెచ్ ప్రభాకర్ రావు పేర్కొన్నారు. అయితే, ఆలస్యంగా చెల్లించే సదుపాయం ఉచితంగా రాదు.
కొన్నిసార్లు ఈ వాయిదాల వెనుక వడ్డీ భారం దాగి ఉండవచ్చని నిపుణులు చెబుతున్నారు. డెవలపర్ సమయానికి ప్రాజెక్ట్ పూర్తి చేస్తాడా లేదా అనేది పరిశీలించడం చాలా ముఖ్యమని పేర్కొంటున్నారు. పేమెంట్ షెడ్యూల్, కన్స్ట్రక్షన్ మైలురాళ్లకు సంబంధించిన ఒప్పంద పత్రాలను జాగ్రత్తగా చదవాలని సూచిస్తున్నారు.
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0
