22ఏ ఎఫెక్ట్.. హైదరాబాద్ రియల్ ఎస్టేట్‌కు రెడ్ అలర్ట్

• రిసేల్ మార్కెట్‌లో పెరుగుతున్న అనిశ్చితి..
  
• లక్షలాది ఆస్తులపై 22ఏ ప్రభావం..
  
• పరిష్కారానికి ప్రభుత్వం ప్రత్యేక వ్యవస్థ తీసుకురావాలంటున్న నిపుణులు

హైదరాబాద్ రియల్ ఎస్టేట్ మార్కెట్‌కు కొత్త సవాల్‌గా 22ఏ (Section 22-A) అంశం మారుతోంది. ప్రభుత్వ అనుమతులతో నిర్మించిన కొన్ని అపార్ట్‌మెంట్లలో కూడా రిజిస్ట్రేషన్లు నిలిచిపోతున్నాయన్న ఫిర్యాదులు పెరుగుతుండటంతో ఫ్లాట్ యజమానులు, కొనుగోలుదారులు, బ్యాంకులు ఆందోళన వ్యక్తం చేస్తున్నాయి. దిల్‌సుఖ్‌నగర్ నుంచి మణికొండ, కొండాపూర్, మియాపూర్, నార్సింగి, గండిపేట వరకు పలు ప్రాంతాల్లో రీసేల్ లావాదేవీలపై ప్రభావం కనిపిస్తోందని మార్కెట్ వర్గాలు చెబుతున్నాయి.

తాజా ఐజీఆర్ఎస్‌ డేటా ప్రకారం తెలంగాణలో సుమారు 30.76 లక్షల 22ఏ నిషేధిత ఆస్తుల ఎంట్రీలు నమోదై ఉన్నాయి. అయితే ఇవన్నీ అపార్ట్‌మెంట్లు కావు. ప్రభుత్వ భూములు, అసైన్డ్ భూములు, వక్ఫ్, ఎండోమెంట్స్, సీలింగ్, వివాదాస్పద భూములు వంటి పలు కేటగిరీల ఆస్తులు కూడా ఇందులో ఉన్నాయి. అయినప్పటికీ, ఈ జాబితాలోని కొన్ని సర్వే నంబర్లలో గతంలో అనుమతులతో నిర్మించిన ప్రాజెక్టులు ఉండటంతో రిజిస్ట్రేషన్ దశలో ఇబ్బందులు ఎదురవుతున్నాయని రియల్ ఎస్టేట్ రంగ ప్రతినిధులు చెబుతున్నారు.

రిసేల్ మార్కెట్‌పైనే ఎక్కువ ప్రభావం

కొత్త ప్రాజెక్టుల కంటే ఇప్పటికే నిర్మాణం పూర్తయిన అపార్ట్‌మెంట్ల రీసేల్ లావాదేవీలపైనే ఈ సమస్య ఎక్కువగా కనిపిస్తోందని నిపుణులు అంటున్నారు. ఫ్లాట్ కొనుగోలు కోసం బ్యాంకు రుణం ఆమోదమైనా, చివరి దశలో రిజిస్ట్రేషన్ నిలిచిపోతే మొత్తం లావాదేవీ ఆగిపోయే పరిస్థితి ఏర్పడుతోంది. దీంతో కొనుగోలుదారులు ముందస్తు చెల్లింపులు చేయడానికి వెనుకాడుతుండగా, విక్రేతలు కూడా ఆస్తి విక్రయానికి ఎక్కువ సమయం ఎదురుచూడాల్సి వస్తోందని చెబుతున్నారు.

హైదరాబాద్ ఇమేజ్‌పై ప్రభావం?

దేశంలో అత్యంత వేగంగా అభివృద్ధి చెందుతున్న రియల్ ఎస్టేట్ మార్కెట్లలో హైదరాబాద్ ఒకటి. 2026లో ప్రభుత్వం మార్కెట్ విలువలను కూడా సవరించింది. పలు ప్రాంతాల్లో రిజిస్ట్రేషన్ విలువలు 25 శాతం నుంచి 100 శాతం వరకు పెంచింది. ఇలాంటి సమయంలో రిజిస్ట్రేషన్ ప్రక్రియపై అనిశ్చితి కొనసాగితే పెట్టుబడిదారుల విశ్వాసంపై ప్రభావం పడే అవకాశం ఉందని మార్కెట్ విశ్లేషకులు హెచ్చరిస్తున్నారు. ముఖ్యంగా రీసేల్ మార్కెట్ మందగిస్తే కొత్త ప్రాజెక్టుల విక్రయాలపై కూడా పరోక్ష ప్రభావం ఉండొచ్చని అభిప్రాయపడుతున్నారు.

ప్రభుత్వం ఏం చేయాలి?

22ఏకు సంబంధించిన స‌మ‌స్య‌ల ప‌రిష్కారానికి.. రియల్ ఎస్టేట్ రంగ నిపుణులు పలు సూచనల్ని చేస్తున్నారు.
ప్రభుత్వ అనుమతులతో నిర్మితమైన అపార్ట్‌మెంట్లకు ప్రత్యేక రక్షణ కల్పించాలి.
హెచ్‌ఎండీఏ, హుడా, టీజీ-రెరా అనుమతులు పొందిన ప్రాజెక్టులను 22ఏ వివాదాల నుంచి వేరు చేసి పరిశీలించాలి.
జిల్లా స్థాయిలో ప్రత్యేక 22ఏ రివ్యూ కమిటీలు ఏర్పాటు చేయాలి.
ప్రతి అభ్యంతరానికి నిర్ణీత గడువులో పరిష్కారం చూపే విధానం తీసుకురావాలి.
ఇప్పటికే నమోదైన ఫ్లాట్లకు ఫాస్ట్-ట్రాక్ క్లియరెన్స్ కల్పించాలి.
కొనుగోలుదారులు, బ్యాంకులు ముందుగానే పరిశీలించేందుకు పూర్తి డిజిటల్ డేటాబేస్‌ను అందుబాటులో ఉంచాలి.

నిపుణుల అభిప్రాయం

రియల్ ఎస్టేట్ నిపుణుల అభిప్రాయం ప్రకారం 22ఏ ఉద్దేశం ప్రభుత్వ లేదా రక్షిత భూములను కాపాడటమే. కానీ చట్టబద్ధ అనుమతులతో నిర్మించిన అపార్ట్‌మెంట్లు, దీర్ఘకాలంగా లావాదేవీలు జరిగిన ఆస్తులు కూడా అనిశ్చితిలో పడితే మార్కెట్‌పై ప్రతికూల ప్రభావం పడుతుంది. నిజమైన వివాదాస్పద ఆస్తులను వేగంగా గుర్తించి, మిగిలిన వాటికి స్పష్టమైన క్లియరెన్స్ ఇవ్వడం ద్వారా మాత్రమే పెట్టుబడిదారుల విశ్వాసం కొనసాగుతుందని చెబుతున్నారు.

ముందున్న సవాల్

22ఏ సమస్య ఇప్పుడు కేవలం రిజిస్ట్రేషన్ అంశం మాత్రమే కాదు. ఇది రీసేల్ మార్కెట్, బ్యాంకు రుణాలు, పెట్టుబడిదారుల నమ్మకం, ప్రభుత్వ ఆదాయం వంటి అనేక అంశాలతో ముడిపడి ఉంది. అందుకే పారదర్శకమైన డిజిటల్ రికార్డులు, వేగవంతమైన వివాద పరిష్కార వ్యవస్థ, స్పష్టమైన మార్గదర్శకాలతో ప్రభుత్వం ముందుకొస్తేనే హైదరాబాద్ రియల్ ఎస్టేట్ మార్కెట్‌లో నెలకొన్న అనిశ్చితికి చెక్ పడుతుందని రంగ నిపుణులు అభిప్రాయపడుతున్నారు.