2047 నాటికి రియల్‌ ఎస్టేట్‌  వాటా 15–20 శాతం.

• ప్రస్తుతం 8–9 శాతం.. 2047 నాటికి 

      రెట్టింపు కావొచ్చని నైట్ ఫ్రాంక్ నివేదిక అంచనా

• పట్టణీకరణ, మౌలిక వసతుల విస్తరణతో 

      రంగానికి భారీ అవకాశాలని వెల్లడి

భారత ఆర్థిక వ్యవస్థలో రియల్‌ ఎస్టేట్‌ రంగం ప్రాధాన్యం రానున్న దశాబ్దాల్లో మరింత పెరగనుంది. ప్రస్తుతం దేశ స్థూల దేశీయోత్పత్తి (జీడీపీ)లో సుమారు 8–9 శాతం వాటా కలిగి ఉన్న ఈ రంగం.. 2047 నాటికి 15–20 శాతానికి చేరే అవకాశం ఉందని నైట్‌ ఫ్రాంక్‌ ఇండియా అంచనా వేసింది. భారత్‌ వేగంగా పట్టణీకరణ దిశగా సాగుతున్న నేపథ్యంలో గృహాలు, కార్యాలయాలు, వాణిజ్య సముదాయాలు, పారిశ్రామిక మౌలిక వసతులకు డిమాండ్‌ పెరగనుంది.

మెరుగైన రహదారులు, మెట్రో రైలు, విమానాశ్రయాలు, ఎక్స్‌ప్రెస్‌వేలు వంటి మౌలిక వసతుల విస్తరణతో కొత్త నగరాలు, నగర శివారు ప్రాంతాలు కూడా రియల్‌ ఎస్టేట్‌ అభివృద్ధికి కేంద్రాలుగా మారే అవకాశం ఉంది. భారత రియల్‌ ఎస్టేట్‌ రంగంలో నివాస విభాగంతో పాటు కార్యాలయాలు, రిటైల్‌, గిడ్డంగులు, డేటా సెంటర్లు, పరిశ్రమలు, హాస్పిటాలిటీ వంటి విభాగాలు కూడా వేగంగా విస్తరిస్తున్నాయి. ముఖ్యంగా సేవల రంగం, గ్లోబల్‌ కెపాబిలిటీ సెంటర్లు (జీసీసీలు), ఈ-కామర్స్‌, తయారీ రంగాల విస్తరణకు అనుగుణంగా వాణిజ్య రియల్‌ ఎస్టేట్‌కు డిమాండ్‌ పెరుగుతోంది.

సవాళ్లు సైతం...

అయితే రియల్‌ ఎస్టేట్‌ రంగం వృద్ధికి కొన్ని ప్రతికూల అంశాలు కొనసాగుతాయని చెబుతున్నారు. ముఖ్యంగా ఇళ్ల ధరలు పెరగడం, అందుబాటు గృహాల కొరత, భూమి ధరలు, నిర్మాణ వ్యయాలు, మౌలిక వసతులపై ఒత్తిడి వంటి అంశాలు కీలక సవాళ్లుగా మారవచ్చు. వేగంగా పెరుగుతున్న డిమాండ్‌కు అనుగుణంగా సరఫరా ఉండటం, గృహాలను అందుబాటులో ఉంచడం భవిష్యత్‌లో అత్యంత కీలకం కానుంది.

మరోవైపు జీసీసీలు, ఐటీ, ఫార్మా, తయారీ, లాజిస్టిక్స్‌ రంగాల విస్తరణతో హైదరాబాద్‌ వంటి నగరాల్లో రియల్‌ ఎస్టేట్‌కు డిమాండ్‌ పెరుగుతోంది. నగర విస్తరణతో శివారు ప్రాంతాల్లో కొత్త నివాస, వాణిజ్య కేంద్రాలు అభివృద్ధి చెందుతున్నాయి. దేశవ్యాప్తంగా పట్టణీకరణ వేగం పెరిగే కొద్దీ హైదరాబాద్‌ సహా ప్రధాన నగరాల చుట్టుపక్కల ప్రాంతాల్లో భూమి, ఇళ్లకు డిమాండ్‌ మరింత పెరిగే అవకాశం ఉంది.

మొత్తంగా.. 2047 నాటికి భారత ఆర్థిక వ్యవస్థలో రియల్‌ ఎస్టేట్‌ వాటా 15–20 శాతానికి చేరుతుందన్న అంచనా.. ఈ రంగం కేవలం ఇళ్ల నిర్మాణానికే పరిమితం కాకుండా దేశ ఆర్థికాభివృద్ధిలో కీలక పాత్ర పోషించబోతోందనే సంకేతంగా చూడవచ్చు. అయితే ఈ వృద్ధి స్థిరంగా కొనసాగాలంటే ధరలు, అందుబాటు, మౌలిక వసతులు, నియంత్రణ వ్యవస్థ వంటి అంశాలపై సమతుల్యత అవసరమని నిపుణులు స్పష్టంచేస్తున్నారు.