విదేశాల్లో సంపాదన..స్వదేశంలో సొంతిల్లు

NRIs are increasingly investing in Indian residential properties, viewing homeownership as a source of long-term financial security, rental income and family comfort.

Nov 13, 2026 - 01:33
Nov 16, 2026 - 01:53
 0  81
విదేశాల్లో సంపాదన..స్వదేశంలో సొంతిల్లు
ముంబై, బెంగళూరు, ఢిల్లీ-ఎన్‌సీఆర్‌, పుణే, హైదరాబాద్‌ నగరాలు ఎన్‌ఆర్‌ఐ గృహ కొనుగోలుదారుల దృష్టిని ఆకర్షిస్తున్నాయి.
  •  ఎన్‌ఆర్‌ఐల ఫేవరెట్‌గా హైదరాబాద్‌

విదేశాల్లో స్థిరపడిన భారతీయులు స్వదేశంలో స్థిరాస్తులు కొనుగోలు చేసేందుకు ఆసక్తి చూపిస్తున్నారు. ఒకప్పుడు ఆస్తి విలువ పెరుగుదల, భవిష్యత్తులో అధిక లాభాలు ప్రధాన లక్ష్యాలుగా ఉండేవి. ఇప్పుడు ఆలోచన మారుతోంది. అద్దె ఆదాయం, నిర్మాణ నాణ్యత, రవాణా సౌకర్యాలు, వైద్య సేవలు, కుటుంబ సభ్యులకు భద్రత వంటి అంశాలనూ పరిగణనలోకి తీసుకుంటున్నారు.

ముఖ్యంగా తల్లిదండ్రుల కోసం సౌకర్యవంతమైన ఇల్లు కొనుగోలు చేయాలనే ఆలోచన ఎన్‌ఆర్‌ఐల నిర్ణయాల్లో కీలకంగా మారుతోంది. ఇటీవల వెలువడిన నివేదికల ప్రకారం ముంబై, బెంగళూరు, ఢిల్లీ-ఎన్‌సీఆర్‌, పుణే, హైదరాబాద్‌ నగరాలు ఎన్‌ఆర్‌ఐ గృహ కొనుగోలుదారుల దృష్టిని ఆకర్షిస్తున్నాయి. 

ఈ ఐదు నగరాల్లో ఒక్కో నగరానికి ఒక్కో ప్రత్యేకత ఉండగా.. ఐటీ, వైద్య రంగాలు, మౌలిక వసతుల విస్తరణతో హైదరాబాద్‌ కూడా కీలక ఎంపికగా నిలుస్తోంది. విదేశాల్లో ఉద్యోగాలు, వ్యాపారాలు చేస్తున్న భారతీయులు స్వదేశంలో ఇల్లు కొనుగోలు చేయడాన్ని దీర్ఘకాలిక ఆర్థిక భద్రతగా చూస్తున్నారు.

కొందరు భవిష్యత్తులో భారత్‌కు తిరిగి వచ్చినప్పుడు నివాసం ఉండేందుకు ఇల్లు కొనుగోలు చేస్తుంటే.. మరికొందరు తల్లిదండ్రులు, కుటుంబ సభ్యుల కోసం ఆస్తులు సమకూరుస్తున్నారు. ఇంకొందరు అద్దె ఆదాయం ద్వారా స్థిరమైన నగదు ప్రవాహాన్ని ఆశిస్తున్నారు.

ఇదీ చదవండి: మంచిరేవుల‌లో మంచి డిమాండ్‌

ఎన్‌ఆర్‌ఐల తొలి ఎంపికల్లో ముందంజ

దేశ ఆర్థిక రాజధాని ముంబై ఎన్‌ఆర్‌ఐ కొనుగోలుదారులకు ప్రధాన ఆకర్షణగా కొనసాగుతోంది. అంతర్జాతీయ విమానాశ్రయం, ఆర్థిక సంస్థలు, వ్యాపార కేంద్రాలు, మెట్రో రైలు, కొత్త రహదారుల అభివృద్ధి ముంబై మెట్రోపాలిటన్‌ రీజియన్‌ పరిధిలోని నివాస ప్రాంతాలకు డిమాండ్‌ పెంచుతున్నాయి.

సంప్రదాయంగా ఖరీదైన ప్రాంతాలకే పరిమితం కాకుండా నవీ ముంబై, పన్వేల్‌, ఇతర అభివృద్ధి చెందుతున్న ప్రాంతాలపైనా కొనుగోలుదారులు దృష్టి సారిస్తున్నారు. మరోవైపు ఐటీ రంగానికి కేంద్రంగా ఉన్న బెంగళూరులో వైట్‌ఫీల్డ్‌, సర్జాపూర్‌ రోడ్‌, బెల్లందూర్‌, ఉత్తర బెంగళూరు ప్రాంతాలు ఎన్‌ఆర్‌ఐలకు ఆకర్షణీయంగా మారుతున్నాయి.

భారీ ఐటీ ఉద్యోగ మార్కెట్‌ కారణంగా అద్దె గృహాలకు డిమాండ్‌ ఉండటం పెట్టుబడిదారులకు అదనపు ప్రయోజనంగా నిలుస్తోంది.

ప్రత్యేకమైన మార్కెట్‌ ఆకర్షణ

ఢిల్లీ-ఎన్‌సీఆర్‌ పరిధిలోని గురుగ్రామ్‌ ప్రీమియం నివాస ప్రాజెక్టులు, కార్పొరేట్‌ కార్యాలయాలు, మెరుగుపడుతున్న రవాణా సదుపాయాలతో ఎన్‌ఆర్‌ఐలను ఆకర్షిస్తోంది. ముఖ్యంగా ద్వారకా ఎక్స్‌ప్రెస్‌వే, గోల్ఫ్‌ కోర్స్‌ రోడ్‌, సోహ్నా రోడ్‌ పరిసరాల్లోని ప్రాజెక్టులపై ఆసక్తి కనిపిస్తోంది. రాజధాని ప్రాంతంలో కుటుంబ సభ్యులు ఉన్నవారికి ఈ ప్రాంతంలో ఇల్లు కొనుగోలు చేయడం అనుకూలంగా మారుతోంది.

పుణే విషయానికి వస్తే.. ఐటీ, ఆటోమొబైల్‌, విద్యా రంగాల అభివృద్ధి ఈ నగరానికి బలంగా నిలుస్తోంది. విద్యాసంస్థలు, వైద్య సదుపాయాలు, ముంబైకి సమీపంగా ఉండటం, ప్రశాంతమైన జీవనశైలి కోరుకునే కుటుంబాలకు అనుకూలంగా ఉండటం పుణేకు ఆదరణ పెంచుతున్నాయి.

ఇదీ చదవండి: 50 ఎకరాల్లో అన్విత పార్క్‌సైడ్!

హైదరాబాద్‌కు ఎందుకు ప్రాధాన్యం?

ఐటీ, ఫార్మా, వైద్య రంగాల్లో హైదరాబాద్‌ సాధిస్తున్న అభివృద్ధి ఎన్‌ఆర్‌ఐల దృష్టిని ఆకర్షిస్తోంది. గచ్చిబౌలి, హైటెక్‌ సిటీ, ఫైనాన్షియల్‌ డిస్ట్రిక్ట్‌, నానక్‌రామ్‌గూడ, కోకాపేట, నార్సింగి వంటి ప్రాంతాల్లో నివాస ప్రాజెక్టులకు డిమాండ్‌ ఉండటం నగరానికి సానుకూలంగా మారుతోంది.

ఔటర్‌ రింగ్‌ రోడ్డు, విమానాశ్రయ అనుసంధానం, విస్తరిస్తున్న రహదారులు కూడా కొనుగోలుదారుల నిర్ణయాలను ప్రభావితం చేస్తున్నాయి.

ముఖ్యంగా పశ్చిమ హైదరాబాద్‌లోని ప్రీమియం అపార్ట్‌మెంట్లు, విల్లాలు, గేటెడ్‌ కమ్యూనిటీలపై ఉన్నత ఆదాయ వర్గాల ఎన్‌ఆర్‌ఐలు ఆసక్తి చూపిస్తున్నారు. మరోవైపు నగరంలోని వైద్య సదుపాయాలు, అంతర్జాతీయ పాఠశాలలు, షాపింగ్‌ కేంద్రాలు కుటుంబ అవసరాలను తీర్చే అవకాశాన్ని కల్పిస్తున్నాయి. హైదరాబాద్‌ నివాస మార్కెట్‌ వృద్ధి కూడా ఈ ఆసక్తికి నేపథ్యంగా నిలుస్తోంది.  

అద్దె ఆదాయం, వైద్య సదుపాయాల పరిశీలన

ఎన్‌ఆర్‌ఐలు ఇప్పుడు ఆస్తి కొనుగోలులో కేవలం భవిష్యత్తు ధరల పెరుగుదలనే కాకుండా.. నెలవారీ అద్దె ఆదాయాన్ని కూడా లెక్కిస్తున్నారు. ఐటీ ఉద్యోగ కేంద్రాలకు సమీపంలో ఉన్న ఇళ్లు, రవాణా సౌకర్యాలు మెరుగ్గా ఉన్న ప్రాంతాలు, నిర్వహణ సదుపాయాలు కలిగిన గేటెడ్‌ కమ్యూనిటీలకు ప్రాధాన్యం ఇస్తున్నారు. మరో కీలక అంశం తల్లిదండ్రుల భవిష్యత్తు అవసరాలు.

ఆసుపత్రులు, వైద్య సేవలు, నిత్యావసర దుకాణాలు, పార్కులు, సామాజిక వాతావరణం అందుబాటులో ఉండే ప్రాంతాల్లో ఇల్లు కొనుగోలు చేయాలని భావిస్తున్నారు. విదేశాల్లో ఉన్నప్పటికీ కుటుంబ సభ్యులకు అవసరమైనప్పుడు సౌకర్యవంతమైన జీవనం అందించాలన్న ఆలోచన ఈ నిర్ణయాల వెనుక కనిపిస్తోంది.

మొత్తంగా చూస్తే.. భారత్‌లో ఇళ్ల కొనుగోలుపై ఎన్‌ఆర్‌ఐల ఆసక్తి కేవలం పెట్టుబడికే పరిమితం కావడం లేదు. కుటుంబ భద్రత, తల్లిదండ్రుల సౌకర్యం, అద్దె ఆదాయం, భవిష్యత్తులో స్వదేశానికి తిరిగి వచ్చే ప్రణాళికలు కూడా కొనుగోలు నిర్ణయాల్లో భాగమవుతున్నాయి. ముంబై, బెంగళూరు, ఢిల్లీ-ఎన్‌సీఆర్‌, పుణేతో పాటు హైదరాబాద్‌ కూడా ఈ మారుతున్న మార్కెట్‌లో తనదైన స్థానాన్ని సంపాదించుకుంటోంది.

ఇదీ చదవండి: రాజేంద్రనగర్‌లో తక్కువ సాంద్రతతో లగ్జరీ విల్లా కమ్యూనిటీ

What's Your Reaction?

Like Like 0
Dislike Dislike 0
Love Love 0
Funny Funny 0
Angry Angry 0
Sad Sad 0
Wow Wow 0