రాయ‌దుర్గంలో ఎక‌రం ధ‌ర‌.. 264 కోట్లు

• కొనుగోలు చేసిన ఎంఎస్ఎన్ రియాల్టీ

ఆర్ ఈ జీ న్యూస్‌, ఆగ‌స్టు 21: ఫార్మా రంగానికి చెందిన ఎంఎస్ఎన్ సంస్థ‌.. రియ‌ల్ రంగంలోకి అడుగుపెట్టి.. వైవిధ్య‌మైన రీతిలో ప్రాజెక్టుల్ని చేప‌డుతుంది. తాజాగా రాయ‌దుర్గంలో ఎక‌రానికి రూ.264 కోట్లు పెట్టి.. 5.25 ఎక‌రాల స్థ‌లాన్ని ఈ సంస్థ కొనుగోలు చేసింది. ఈ భూలావాదేవీ వ‌ల్ల తెలంగాణ ఖ‌జానాలోకి రూ.1,386 కోట్లు వ‌చ్చాయి. టీజీఐఐసీ ఈ ప్లాటుకు క‌నీస ధ‌ర‌గా ఎక‌రానికి రూ.175 కోట్లుగా నిర్ణ‌యించింది. అయితే వేలంలో పోటీ పెరగడంతో ఎకరానికి రూ.264 కోట్లు పెట్టి ఈ భూమిని ఎంఎస్ఎన్ రియాల్టీ ద‌క్కించుకుంది. అంటే రిజర్వ్‌ ధర కంటే 50.9 శాతం ఎక్కువ ధర వచ్చింద‌నే చెప్పాలి. 

రాయ‌దుర్గంలో భూముల ధరలు ఎంత వేగంగా పెరుగుతున్నాయో ఈ వేలం మరోసారి స్పష్టం చేసింది. హైదరాబాద్‌లో కీలకమైన ఐటీ, కమర్షియల్‌ కారిడార్‌గా రాయ‌దుర్గం అభివృద్ధి చెందుతుండటంతో ప్రముఖ డెవలపర్లు ఇక్కడి భూములపై ఆసక్తి చూపుతున్నారు. ఇదే రాయ‌దుర్గంలో మే 2026లో జరిగిన వేలంలో ఎకరం రూ.237 కోట్లకు అమ్ముడైంది. ఇప్పుడు ఆ రికార్డును అధిగమిస్తూ ఆగస్టులో జరిగిన తాజా వేలంలో ఎకరం రూ.264 కోట్లకు చేరింది. అంటే కేవలం మూడు నెలల వ్యవధిలోనే రైడుర్గ్‌లో ఎకరానికి భూమి ధర రూ.27 కోట్లు పెరిగింది.

ఈ వేలాన్ని ఎంఎస్‌టీసీ ఈ-ఆక్ష‌న్ ప్లాట్‌ఫామ్‌ ద్వారా నిర్వహించారు. జేఎల్ఎల్‌ ప్రత్యేక లావాదేవీ సలహాదారుగా వ్యవహరించింది. పారదర్శకంగా వేలం నిర్వహించడంతో ప్రముఖ జాతీయ స్థాయి డెవలపర్లు పోటీలో పాల్గొన్నారు. టీజీఐఐసీ వైస్‌ చైర్మన్‌, మేనేజింగ్‌ డైరెక్టర్‌ కె. శశాంక, IAS మాట్లాడుతూ.. రైడుర్గ్‌ భూమి వేలం ఫలితం తెలంగాణ భవిష్యత్తుపై డెవలపర్లకు ఉన్న నమ్మకాన్ని చూపిస్తోందన్నారు. పారదర్శకత, మెరుగైన మౌలిక వసతులు, అభివృద్ధి ద్వారా రాష్ట్రం విలువను సృష్టిస్తోందని పేర్కొన్నారు. హైదరాబాద్‌ ఇప్పుడు ప్రపంచ స్థాయి బిజినెస్‌ డెస్టినేషన్‌గా మారుతున్న నేపథ్యంలో.. రాయ‌దుర్గం భూమికి ఎకరం రూ.264 కోట్ల ధర పలకడం నగర రియల్‌ ఎస్టేట్‌ మార్కెట్‌లో కొత్త మైలురాయిగా నిలిచింది.