ప్రతి ఇంటికీ డిజిటల్‌ అడ్రస్‌..  మీ డిజిపిన్‌ తెలుసా?

ఇంటి అడ్రస్‌ చెప్పాలంటే ల్యాండ్‌మార్క్‌.. లొకేషన్‌ షేర్‌ చేయాలంటే గూగుల్‌ మ్యాప్స్‌.. పోస్టు, కొరియర్‌ వస్తే పిన్‌కోడ్‌.. ఇకపై ఈ ఇబ్బందులకు డిజిటల్‌ పరిష్కారం రాబోతోంది. ఇండియా పోస్ట్‌ తీసుకొచ్చిన డిజిపిన్‌ (DIGIPIN)తో దేశంలోని ప్రతి ప్రదేశానికి ప్రత్యేకమైన డిజిటల్‌ అడ్రస్‌ అందుబాటులోకి వస్తోంది.

4×4 మీటర్ల ప్రాంతానికో కోడ్‌

డిజిపిన్‌ అనేది 10 అక్షరాలు, అంకెలతో కూడిన జియో-కోడెడ్‌ అడ్రస్‌ సిస్టమ్‌. దేశాన్ని సుమారు 4×4 మీటర్ల చిన్న గ్రిడ్లుగా విభజించి.. ప్రతి గ్రిడ్‌కు ప్రత్యేక కోడ్‌ కేటాయిస్తారు. అక్షాంశం, రేఖాంశం ఆధారంగా ఈ కోడ్‌ రూపొందుతుంది. అంటే సాధారణ పిన్‌కోడ్‌ ఒక పెద్ద ప్రాంతాన్ని గుర్తిస్తే.. డిజిపిన్‌ మాత్రం నిర్దిష్ట ప్రదేశాన్ని మరింత కచ్చితంగా గుర్తించగలదు.

పిన్‌కోడ్‌కు ప్రత్యామ్నాయం కాదు

డిజిపిన్‌ రావడంతో ప్రస్తుతం ఉన్న 6 అంకెల పిన్‌కోడ్‌ లేదా సంప్రదాయ చిరునామా రద్దు కాదు. వాటికి అదనపు డిజిటల్‌ లేయర్‌గా డిజిపిన్‌ పనిచేస్తుంది. ముఖ్యంగా కొరియర్‌, ఈ-కామర్స్‌ డెలివరీలు, అత్యవసర సేవలు, ప్రభుత్వ పథకాలు, నావిగేషన్‌ వంటి వాటిలో ఇది ఉపయోగపడనుంది. మారుమూల ప్రాంతాల్లో స్పష్టమైన వీధి, ఇంటి నంబర్‌ లేకపోయినా.. భౌగోళిక లొకేషన్‌ను కచ్చితంగా గుర్తించేందుకు ఇది ఉపయోగపడుతుంది.

మీ డిజిపిన్‌ ఎలా తెలుసుకోవాలి?

ఇండియా పోస్ట్‌ ప్రత్యేకంగా రూపొందించిన వెబ్‌ అప్లికేషన్‌ ద్వారా మీ ప్రదేశానికి సంబంధించిన డిజిపిన్‌ను తెలుసుకోవచ్చు. లాగిన్‌ లేదా సైన్‌అప్‌ అవసరం లేదు. పరికరంలో లొకేషన్‌ యాక్సెస్‌కు అనుమతి ఇస్తే.. మీ ప్రస్తుత ప్రదేశానికి సంబంధించిన డిజిపిన్‌ పొందవచ్చు. [ఇండియా పోస్ట్ డిజ్ పిన్ వెబ్‌ అప్లికేషన్‌](https://dac.indiapost.gov.in/mydigipin/home?utm_source=chatgpt.com). మొత్తంగా.. పిన్‌కోడ్‌ ఒక ప్రాంతాన్ని చెబితే.. డిజిపిన్‌ ఒక నిర్దిష్ట ప్రదేశాన్ని గుర్తించే డిజిటల్‌ చిరునామాగా మారనుంది. భవిష్యత్తులో డెలివరీల నుంచి అత్యవసర సేవల వరకు.. డిజిటల్‌ అడ్రసింగ్‌లో ఇది కీలకంగా మారే అవకాశం ఉంది.