ఇళ్ల అమ్మకాలు డౌన్

• దేశంలోని ఎనిమిది నగరాల్లో 6.1 శాతం మేర తగ్గుదల
• పుణె, బెంగళూరుపై ఎక్కువ ప్రభావం
• హైదరాబాద్, చెన్నైలో మాత్ర పెరిగిన అమ్మకాలు

దేశంలోని ప్రధాన రియల్‌ ఎస్టేట్‌ మార్కెట్లలో ఇళ్ల విక్రయాలు కొంత మందగించాయి. 2026 ఏప్రిల్‌–జూన్‌ త్రైమాసికంలో దేశంలోని టాప్‌ 8 నగరాల్లో కలిపి 91,729 ఇళ్లు అమ్ముడయ్యాయి. గత ఏడాది ఇదే కాలంలో నమోదైన 97,674 యూనిట్లతో పోలిస్తే విక్రయాలు 6.1 శాతం తగ్గాయి. అయితే ఇది మార్కెట్‌ పతనానికి సంకేతం కాదని, కొనుగోలుదారులలో కొంతకాలిక జాగ్రత్త, అధిక ధరలు, ఆర్థిక అనిశ్చితి వంటి అంశాల ప్రభావంగా నిపుణులు భావిస్తున్నారు. ఈ త్రైమాసికంలో అత్యధికంగా ప్రభావితమైన నగరాల్లో పుణె ముందుంది. అక్కడ ఇళ్ల విక్రయాలు ఏకంగా 20.8 శాతం తగ్గి 12,642 యూనిట్లకు చేరాయి. బెంగళూరులోనూ విక్రయాలు 9.2 శాతం తగ్గి 14,186 యూనిట్లకు పరిమితమయ్యాయి. అహ్మదాబాద్‌లో 20.2 శాతం, కోల్‌కతాలో 8.6 శాతం, ఢిల్లీ-ఎన్‌సీఆర్‌లో 7 శాతం, ముంబయి మెట్రోపాలిటన్‌ రీజియన్‌లో 7 శాతం మేర అమ్మకాలు తగ్గాయి.

హైదరాబాద్‌, చెన్నైలో మాత్రం జోరు

దేశవ్యాప్తంగా విక్రయాలు తగ్గినప్పటికీ హైదరాబాద్‌, చెన్నై మార్కెట్లు మాత్రం భిన్నమైన ఫలితాలను చూపించాయి. హైదరాబాద్‌లో ఇళ్ల విక్రయాలు సుమారు 14.6 శాతం పెరిగి 13,196 యూనిట్లకు చేరాయి. చెన్నైలో ఏకంగా 36 శాతం వృద్ధితో 7,183 ఇళ్లు అమ్ముడయ్యాయి. దీంతో టెక్నాలజీ, ఐటీ ఆధారిత నగరాల్లోనూ మార్కెట్‌ పరిస్థితులు ఒకే విధంగా లేవని గణాంకాలు స్పష్టం చేస్తున్నాయి. ఇళ్ల అమ్మకాలు తగ్గినా ప్రాపర్టీ ధరలపై పెద్దగా ప్రభావం కనిపించలేదు. టాప్‌ 8 నగరాల్లో సేల్స్‌-వెయిటెడ్‌ సగటు ధర చదరపు అడుగుకు సుమారు రూ.10,153గా నమోదైంది. అంతకుముందు త్రైమాసికంతో పోలిస్తే ఇది దాదాపు 1 శాతం ఎక్కువ. అంటే కొనుగోలుదారుల సంఖ్య కొంత తగ్గుతున్నప్పటికీ, డెవలపర్లు ధరలను భారీగా తగ్గించే పరిస్థితి ఇంకా రాలేదని మార్కెట్‌ గణాంకాలు సూచిస్తున్నాయి. మరోవైపు డెవలపర్లు కొత్త ప్రాజెక్టుల విషయంలో వెనక్కి తగ్గలేదు. ఏప్రిల్‌–జూన్‌ త్రైమాసికంలో కొత్తగా 89,161 ఇళ్లను మార్కెట్లోకి తీసుకొచ్చారు. గత ఏడాది ఇదే కాలంతో పోలిస్తే కొత్త సరఫరా సుమారు 6 శాతం పెరిగింది.

టెక్‌ ఉద్యోగాల ప్రభావం

పుణె, బెంగళూరు వంటి టెక్నాలజీ ఆధారిత నగరాల్లో ఉద్యోగాలపై నెలకొన్న అనిశ్చితి కూడా ఇళ్ల కొనుగోళ్లపై ప్రభావం చూపినట్లు నివేదికలు పేర్కొంటున్నాయి. ముఖ్యంగా రూ. కోటి లోపు ఇళ్ల విభాగంలో కొనుగోలుదారులు ఆచితూచి నిర్ణయాలు తీసుకుంటున్నారని తెలుస్తోంది. ఏఐ ఆధారిత ఉద్యోగ మార్పులు, టెక్‌ రంగంలో ఉద్యోగాల కోతలు, ప్రపంచ ఆర్థిక పరిస్థితులపై ఆందోళనలు మధ్యతరగతి కొనుగోలుదారుల నిర్ణయాలను ప్రభావితం చేస్తున్నాయి. ఇళ్ల విక్రయాల మొత్తం సంఖ్య తగ్గుతున్నప్పటికీ, అధిక విలువ కలిగిన ప్రీమియం, లగ్జరీ హౌసింగ్‌ విభాగానికి డిమాండ్‌ కొనసాగుతోంది. కొనుగోలు శక్తి ఉన్న వర్గాలు మెరుగైన లొకేషన్‌, పెద్ద విస్తీర్ణం, అత్యాధునిక సదుపాయాలు ఉన్న ఇళ్ల వైపు మొగ్గుచూపుతున్నాయి. దీంతో యూనిట్ల సంఖ్య తగ్గినా మొత్తం రియల్‌ ఎస్టేట్‌ మార్కెట్‌ విలువపై ప్రభావం పరిమితంగానే ఉంటోంది. ఇదే సమయంలో ప్రధాన నగరాల్లో ప్రాపర్టీ ధరలు పెరుగుతూనే ఉన్నాయి.