గండిపేట.. గ్లోబల్‌ సిటీకి గ్రీన్‌ గేట్‌వే

హైదరాబాద్‌ రియల్‌ ఎస్టేట్‌ పటంలో పశ్చిమ ప్రాంతానికి ప్రత్యేక స్థానం ఉంది. ఒకప్పుడు మాదాపూర్‌, గచ్చిబౌలి వరకు పరిమితమైన రియల్‌ ఎస్టేట్‌ కార్యకలాపాలు.. ఐటీ రంగం విస్తరణతో కొకాపేట్‌, నార్సింగి, పుప్పాలగూడ, మంచిరేవుల, గండిపేట వరకు విస్తరించాయి. ఈ విస్తరణలో గండిపేట ఇప్పుడు ప్రత్యేక ఆకర్షణగా మారుతోంది. ఒకప్పుడు హైదరాబాద్‌ నగరానికి దూరంగా.. గండిపేట చెరువు, పచ్చని వాతావరణంతో మాత్రమే గుర్తింపు పొందిన ఈ ప్రాంతం.. ఇప్పుడు ప్రీమియం నివాస ప్రాంతంగా రూపాంతరం చెందుతోంది. భారీ గేటెడ్‌ కమ్యూనిటీలు, విల్లా ప్రాజెక్టులు, లగ్జరీ అపార్ట్‌మెంట్లు, విద్యా సంస్థలు, ఆసుపత్రులు, కమర్షియల్‌ సదుపాయాలు క్రమంగా విస్తరిస్తున్నాయి. ముఖ్యంగా కొకాపేట్‌, నార్సింగి, ఫైనాన్షియల్‌ డిస్ట్రిక్ట్‌, గచ్చిబౌలి వంటి ప్రధాన రియల్‌ ఎస్టేట్‌, ఉద్యోగ కేంద్రాలకు చేరువగా ఉండటం గండిపేటకు ప్రధాన బలంగా మారింది.

గండిపేటకు బలంగా మారిన కనెక్టివిటీ

గండిపేట రియల్‌ ఎస్టేట్‌ వృద్ధికి ప్రధాన కారణాల్లో కనెక్టివిటీ ఒకటి. ORRకు సమీపంగా ఉండటంతో నగరంలోని ఇతర ప్రాంతాలకు, విమానాశ్రయానికి వెళ్లేందుకు రోడ్డు మార్గం సులభంగా మారింది. గచ్చిబౌలి, ఫైనాన్షియల్‌ డిస్ట్రిక్ట్‌, కొకాపేట్‌, నార్సింగి ప్రాంతాలకు రోడ్డు కనెక్టివిటీ ఉండటంతో అక్కడ పనిచేసే ఉద్యోగులు గండిపేటను నివాస ప్రాంతంగా ఎంచుకుంటున్నారు. ఐటీ కారిడార్‌కు దగ్గరగా ఉండటంతోపాటు.. పశ్చిమ హైదరాబాద్‌లోని విద్యా సంస్థలు, కార్పొరేట్‌ ఆసుపత్రులు, షాపింగ్‌, వినోద కేంద్రాలకు కూడా గండిపేట నుంచి సులభంగా చేరుకునే అవకాశం ఉండటం ఇక్కడి నివాస డిమాండ్‌ను పెంచుతోంది.

కొకాపేట్‌ ధరల ప్రభావం

పశ్చిమ హైదరాబాద్‌లో రియల్‌ ఎస్టేట్‌ ధరలు ఏ స్థాయికి చేరుకున్నాయో కొకాపేట్‌ భూముల ధరలు స్పష్టం చేస్తున్నాయి. 2025లో కొకాపేట్‌ నెయోపొలిస్‌లో జరిగిన భూవేలంలో ఎకరానికి రూ.151.25 కోట్ల వరకు ధర పలికింది. కొకాపేట్‌లో భూమి ధరలు భారీగా పెరగడంతో.. చుట్టుపక్కల ప్రాంతాలపై కూడా పెట్టుబడిదారుల దృష్టి పెరిగింది. ఈ ప్రభావం గండిపేటపైనా కనిపిస్తోంది. కొకాపేట్‌కు సమీపంగా ఉండటం, అదే పశ్చిమ హైదరాబాద్‌ అభివృద్ధి కారిడార్‌లో భాగంగా ఉండటం గండిపేటకు కలిసొస్తోంది. అయితే కొకాపేట్‌ ధరలను గండిపేటకు నేరుగా వర్తింపజేయడం సరికాదు. ప్రతి ప్రాంతంలో భూమి విలువ రోడ్డు వెడల్పు, కనెక్టివిటీ, ప్రాజెక్టుల నాణ్యత, జోనింగ్‌, అభివృద్ధి స్థాయి ఆధారంగా మారుతుంది.

చదరపు అడుగు రూ.10 వేల మార్క్‌ దాటుతున్న ప్రాజెక్టులు

గండిపేటలో అపార్ట్‌మెంట్‌ మార్కెట్‌ కూడా వేగంగా విస్తరిస్తోంది. ప్రాజెక్టు, నిర్మాణ సంస్థ, సౌకర్యాలు, నిర్మాణ దశను బట్టి ధరల్లో వ్యత్యాసం ఉన్నప్పటికీ.. ప్రీమియం ప్రాజెక్టుల్లో చదరపు అడుగు ధర రూ.10 వేల మార్క్‌ను దాటుతోంది. కొన్ని ప్రాజెక్టుల్లో భారీ సైజు 3, 4, 5 BHK అపార్ట్‌మెంట్లు అందుబాటులోకి వస్తున్నాయి. పెద్ద విస్తీర్ణం, క్లబ్‌హౌస్‌, స్విమ్మింగ్‌ పూల్‌, జిమ్‌, ల్యాండ్‌స్కేపింగ్‌, ఇతర లగ్జరీ సౌకర్యాలతో ప్రాజెక్టులు అభివృద్ధి చెందుతున్నాయి. దీంతో గండిపేటలో అపార్ట్‌మెంట్‌ మార్కెట్‌ కూడా సాధారణ నివాస విభాగం నుంచి ప్రీమియం హౌసింగ్‌ వైపు మళ్లుతోంది.

విల్లాలకు పెరుగుతున్న డిమాండ్‌

గండిపేటకు ప్రత్యేక గుర్తింపు తీసుకొస్తున్న మరో విభాగం విల్లాలు. ప్రశాంతమైన వాతావరణం, ఎక్కువ స్థలం, గేటెడ్‌ కమ్యూనిటీ జీవనశైలి కోరుకునే అధిక ఆదాయ వర్గాలు గండిపేట వైపు చూస్తున్నారు. ప్రాజెక్టు స్థానం, భూమి విస్తీర్ణం, నిర్మాణ విస్తీర్ణం, సౌకర్యాలను బట్టి ఇక్కడ విల్లాల ధరలు భారీగా మారుతున్నాయి. ప్రీమియం ప్రాజెక్టుల్లో రూ.10 కోట్లకు పైగా ధరలు ఉండగా.. అత్యంత లగ్జరీ విల్లాలు రూ.20 కోట్లకు మించి కూడా మార్కెట్లో కనిపిస్తున్నాయి. దీంతో గండిపేటలో విల్లా మార్కెట్‌ సాధారణ హౌసింగ్‌ నుంచి లగ్జరీ రియల్టీ విభాగంలోకి వేగంగా అడుగుపెడుతోంది.

గండిపేటకు మరో బలం.. పచ్చదనం

హైదరాబాద్‌లో పెరుగుతున్న ట్రాఫిక్‌, కాలుష్యం, అధిక జనసాంద్రత నేపథ్యంలో.. నగరానికి సమీపంలోనే ప్రశాంతమైన వాతావరణం కోరుకునే వారి సంఖ్య పెరుగుతోంది. ఈ విషయంలో గండిపేటకు సహజమైన ప్రయోజనం ఉంది. గండిపేట చెరువు, పచ్చని ప్రాంతాలు, తక్కువ సాంద్రత ఉన్న కొన్ని పరిసరాలు.. ప్రీమియం నివాస ప్రాజెక్టులకు ప్రత్యేక ఆకర్షణగా మారుతున్నాయి. అందుకే గండిపేటలోని అనేక ప్రాజెక్టులు ప్రకృతి, విశాలమైన ఓపెన్‌ స్పేస్‌, ల్యాండ్‌స్కేపింగ్‌, రిసార్ట్‌ తరహా సౌకర్యాలను తమ ప్రధాన విక్రయ అంశాలుగా ప్రచారం చేస్తున్నాయి.

భారీ మౌలిక వసతులు.. భవిష్యత్‌పై ఆశలు

గండిపేట భవిష్యత్‌ రియల్‌ ఎస్టేట్‌ వృద్ధిలో ప్రభుత్వ మౌలిక వసతుల ప్రాజెక్టులు కూడా కీలకం కానున్నాయి. మూసీ రివర్‌ రివిటలైజేషన్‌లో భాగంగా గండిపేటలోనే రూ.7,360 కోట్ల విలువైన ప్రాజెక్టులకు ప్రభుత్వం శంకుస్థాపన చేసింది. గండిపేటకు సంబంధించిన తాగునీటి మౌలిక వసతులు, ఉస్మాన్‌సాగర్‌, హిమాయత్‌సాగర్‌ అభివృద్ధి వంటి అంశాలు కూడా ఈ ప్రాంత భవిష్యత్‌ ప్రాధాన్యాన్ని పెంచుతున్నాయి. అయితే ప్రభుత్వ ప్రాజెక్టు ప్రకటించబడిందనే కారణంతోనే భూమి ధరలు వెంటనే పెరుగుతాయని భావించడం సరికాదు. ప్రాజెక్టు అమలు, కనెక్టివిటీ, జోనింగ్‌, అనుమతులు వంటి అంశాలను పరిశీలించిన తర్వాతే పెట్టుబడి నిర్ణయం తీసుకోవాలి.

రేపటి గండిపేట ఎలా ఉంటుంది?

హైదరాబాద్‌ పశ్చిమ దిశగా విస్తరిస్తున్న కొద్దీ.. కొకాపేట్‌, నార్సింగి, గండిపేట వంటి ప్రాంతాల మధ్య రియల్‌ ఎస్టేట్‌ అనుసంధానం మరింత పెరిగే అవకాశం ఉంది. ఇప్పటికే కొకాపేట్‌ ఒక అల్ట్రా ప్రీమియం మార్కెట్‌గా మారింది. నార్సింగి పెద్ద రెసిడెన్షియల్‌ క్లస్టర్‌గా ఎదుగుతోంది. ఈ రెండు మార్కెట్ల మధ్య గండిపేట తనకంటూ ప్రత్యేకమైన గ్రీన్‌–లగ్జరీ రెసిడెన్షియల్‌ గుర్తింపును ఏర్పరుచుకుంటోంది. అందుకే గండిపేటను కేవలం మరో రియల్‌ ఎస్టేట్‌ ప్రాంతంగా చూడలేం. ఐటీ కారిడార్‌కు దగ్గరగా.. ఓఆర్ఆర్‌ కు చేరువగా.. కోకాపేట్‌–నార్సింగి ప్రీమియం మార్కెట్ల మధ్య.. పచ్చదనాన్ని కాపాడుకుంటూ ఎదుగుతున్న కొత్త నివాస గమ్యస్థానంగా చూడాల్సిన అవసరం ఉంది. రానున్న రోజుల్లో మౌలిక వసతులు, ఉద్యోగ కేంద్రాలు, కనెక్టివిటీ, ప్రీమియం హౌసింగ్‌ డిమాండ్‌ మరింత పెరిగితే.. గండిపేట హైదరాబాద్‌ లగ్జరీ రియల్టీ మ్యాప్‌లో మరింత కీలక స్థానాన్ని సంపాదించే అవకాశం ఉంది.