మూసారాంబాగ్‌-అంబర్‌పేటకు  కొత్త వంతెన.. ప్రారంభం ఎప్పుడు?

హైదరాబాద్‌ తూర్పు ప్రాంతంలో కీలకమైన మూసారాంబాగ్‌-అంబర్‌పేట మార్గంలో కొత్త హైలెవల్‌ వంతెన అందుబాటులోకి రానుంది. మూసీ నదిపై నిర్మిస్తున్న ఈ వంతెన పనులు దాదాపు పూర్తయ్యాయి. మిగిలిన అప్రోచ్‌ రోడ్డు పనులను కూడా వేగంగా పూర్తి చేసి సెప్టెంబర్ నెలలో ప్రారంభించేందుకు అధికారులు సన్నాహాలు చేస్తున్నారు. సుమారు రూ.52 కోట్ల వ్యయంతో 220 మీటర్ల పొడవు, 29.5 మీటర్ల వెడల్పుతో కొత్త వంతెనను నిర్మించారు. ఆరు లేన్లుగా ఉండే ఈ బ్రిడ్జిపై వాహనాల రాకపోకలకు 20 మీటర్ల క్యారేజ్‌వే, ఇరువైపులా ఫుట్‌పాత్‌లు ఏర్పాటు చేశారు. వంతెన నిర్మాణం పూర్తికాగా.. రెండు వైపులా అప్రోచ్‌ రోడ్ల పనులు తుదిదశలో ఉన్నాయి.

వరదలకు చెక్‌ పెట్టేలా..

మూసారాంబాగ్‌-అంబర్‌పేట పాత వంతెన తక్కువ ఎత్తులో ఉండటంతో భారీ వర్షాలు, మూసీకి వరద వచ్చిన సమయంలో రాకపోకలు నిలిచిపోయేవి. ముఖ్యంగా ఉస్మాన్‌సాగర్‌, హిమాయత్‌సాగర్‌ జలాశయాల నుంచి నీటి విడుదల పెరిగినప్పుడు ఈ మార్గంలో ట్రాఫిక్‌కు తీవ్ర అంతరాయం ఏర్పడేది. కొత్త వంతెనను ఎత్తుగా నిర్మించడంతో ఈ సమస్యకు పరిష్కారం లభించే అవకాశం ఉంది.

తూర్పు హైదరాబాద్‌కు మెరుగైన కనెక్టివిటీ

కొత్త వంతెన అందుబాటులోకి వస్తే మూసారాంబాగ్‌, అంబర్‌పేట, మలక్‌పేట, సైదాబాద్‌, దిల్‌సుఖ్‌నగర్‌ తదితర ప్రాంతాల మధ్య రాకపోకలు మరింత సులభం కానున్నాయి. ముఖ్యంగా పీక్‌ అవర్స్‌లో ట్రాఫిక్‌ ఒత్తిడి తగ్గడంతో పాటు.. వర్షాకాలంలో ప్రత్యామ్నాయ మార్గాలపై ఆధారపడాల్సిన అవసరం తగ్గనుంది.

ఆలస్యమైనా.. అందుబాటులోకి

వంతెన నిర్మాణానికి 2023లో శంకుస్థాపన జరగగా.. 2024లో పనులు ప్రారంభమయ్యాయి. నిర్మాణ సమయంలో పలు సాంకేతిక సమస్యల కారణంగా పనులు ఆలస్యమయ్యాయి. ప్రస్తుతం ప్రధాన వంతెన పనులు పూర్తవడంతో ప్రారంభోత్సవంపై అధికారులు దృష్టి పెట్టారు. మూసీపై కొత్త వంతెన.. తూర్పు హైదరాబాద్‌కు కొత్త కనెక్టివిటీ.. వర్షాకాలంలో ట్రాఫిక్‌ కష్టాలకు కొంతమేర ఉపశమనం.. ఇలా ఈ వంతెన నగర రవాణా వ్యవస్థలో మరో కీలక మౌలిక వసతిగా మారనుంది.