వానాకాలంలో ఉడెన్ ఫర్నిచర్ ను ఇలా ఉంచుకుందాం..

వర్షాకాలం వచ్చిందంటే చల్లని వాతావరణం, పచ్చని ప్రకృతి మనసుకు హాయినిస్తాయి. కానీ ఇదే కాలం ఇంట్లోని ఉడెన్ ఫర్నిచర్‌కు పెద్ద పరీక్షగా మారుతుంది. గాలిలో తేమ శాతం పెరగడంతో చెక్క తేమను పీల్చుకుని ఉబ్బిపోవడం, ఆకారం మారడం, బూజు పట్టడం, దుర్వాసన రావడం, చెదలు చేరడం వంటి సమస్యలు తలెత్తుతాయి. సరైన జాగ్రత్తలు తీసుకోకపోతే ఖరీదైన ఫర్నిచర్ కొద్ది కాలంలోనే దెబ్బతింటుంది.

వర్షాకాలంలో గాలిలో తేమ 80–90 శాతం వరకు పెరిగే ప్రాంతాల్లో ఈ ప్రభావం మరింత ఎక్కువగా ఉంటుంది. దీంతో అల్మారాలు సరిగా మూసుకోకపోవడం, డ్రాయర్లు ఇరుక్కుపోవడం, టేబుళ్లు, తలుపులు వంకర తిరగడం, పాలిష్ మసకబారడం వంటి సమస్యలు కనిపిస్తాయి. తేమ ఎక్కువసేపు ఉంటే బూజు, ఫంగస్ పెరిగి దుర్వాసన కూడా వస్తుంది. ఇలాంటి పరిస్థితుల్లో చెదలు కూడా వేగంగా వ్యాపించే అవకాశం ఉంటుంది. కొన్ని జాగ్రత్తలు తీసుకుంటే వీటిని సమర్థంగా ఎదుర్కోవచ్చని నిపుణులు చెబుతున్నారు.

గోడలకు ఆనించి ఉంచొద్దు

వర్షాకాలంలో బయట గోడల్లో తేమ ఎక్కువగా ఉంటుంది. అందువల్ల చెక్క ఫర్నిచర్‌ను గోడలకు పూర్తిగా ఆనించి ఉంచకుండా కనీసం మూడు నుంచి నాలుగు అంగుళాల దూరంలో ఉంచాలి. అలాగే కిటికీల పక్కన వర్షపు నీరు తాకే ప్రాంతాల్లో ఉంచడం కూడా మంచిది కాదు. గాలి సరిగా ప్రసరించేలా అమర్చడం వల్ల తేమ తగ్గుతుంది. ఇంట్లో తేమ నిల్వ ఉండకుండా ఫ్యాన్లు, ఎగ్జాస్ట్ ఫ్యాన్లు లేదా ఎయిర్ కండీషనర్‌ను అవసరానికి అనుగుణంగా ఉపయోగించాలి. వర్షం లేని సమయంలో కిటికీలు తెరిచి సహజ గాలి వచ్చేలా చూడాలి. తేమ ఎక్కువగా ఉండే ప్రాంతాల్లో డీహ్యూమిడిఫైయర్ లేదా సిలికా జెల్ ప్యాకెట్లు ఉపయోగిస్తే మంచి ఫలితం ఉంటుంది.

తడి గుడ్డతో తుడవొద్దు

చెక్క ఫర్నిచర్‌ను తడి గుడ్డతో శుభ్రం చేయడం వల్ల తేమ మరింత లోపలకు చేరే ప్రమాదం ఉంది. కాబట్టి మృదువైన పొడి గుడ్డతోనే తరచూ దుమ్ము తుడవాలి. అవసరమైతే వెంటనే పొడిగా తుడిచి తేమ లేకుండా చూడాలి.

పాలిష్ రక్షణ కవచంలా పనిచేస్తుంది
వర్షాకాలం ప్రారంభానికి ముందు నాణ్యమైన వుడ్ పాలిష్, వార్నిష్ లేదా వ్యాక్స్ పూత వేయడం మంచిది. ఇది చెక్కపై రక్షణ పొరను ఏర్పరచి తేమ లోపలికి వెళ్లకుండా అడ్డుకుంటుంది. దీంతో ఫర్నిచర్ మెరుపు కూడా ఎక్కువకాలం నిలిచి ఉంటుంది. అలాగే ఇంటిని తుడిచిన తర్వాత ఫర్నిచర్ కాళ్లు ఎక్కువసేపు తడి నేలపై ఉండకూడదు. అవసరమైతే రబ్బరు లేదా ఫెల్ట్ ప్యాడ్లు అమర్చాలి. ఇలా చేస్తే చెక్క అడుగు భాగం తేమను పీల్చుకోకుండా ఉంటుంది.

చెదలు, బూజుపై నిఘా

వర్షాకాలంలో చెదలు వేగంగా పెరుగుతాయి. ఫర్నిచర్ అడుగు భాగం, మూలలు, జాయింట్ల వద్ద చిన్న రంధ్రాలు, చెక్క పొడి, నల్లటి లేదా ఆకుపచ్చ బూజు మచ్చలు కనిపిస్తే వెంటనే చర్యలు తీసుకోవాలి. అవసరమైతే పెస్ట్ కంట్రోల్ నిపుణుల సేవలు తీసుకోవడం ఉత్తమం. వేడి టీ కప్పులు, తడి గ్లాసులు, మొక్కల కుండీలను నేరుగా చెక్కపై ఉంచితే వలయాకార మరకలు, రంగు మారడం, ఉబ్బిపోవడం వంటి సమస్యలు వస్తాయి. కోస్టర్లు, ట్రేలు, మ్యాట్లు ఉపయోగించడం అలవాటు చేసుకోవాలి.

చిన్న పగుళ్లను నిర్లక్ష్యం చేయవద్దు

చెక్కలో చిన్న పగుళ్లు లేదా వదులైన జాయింట్లు కనిపిస్తే వెంటనే మరమ్మతు చేయించాలి. లేకపోతే తేమ లోపలికి చేరి నష్టం మరింత పెరుగుతుంది. షీషమ్, టీక్, అకేసియా వంటి ఘనమైన సహజ చెక్కతో తయారైన ఫర్నిచర్ తేమను కొంతవరకు తట్టుకోగలదు. అయితే ఎంఢీఎఫ్, పార్టికల్ బోర్డు వంటి ఇంజినీర్డ్ వుడ్‌తో తయారైన ఫర్నిచర్ వర్షాకాలంలో త్వరగా దెబ్బతినే అవకాశం ఎక్కువగా ఉంటుందని నిపుణులు సూచిస్తున్నారు.

వర్షాకాలంలో చెక్క ఫర్నిచర్‌ను సంరక్షించడం కష్టం కాదు. కొద్దిపాటి జాగ్రత్తలు, క్రమం తప్పకుండా శుభ్రపరచడం, తేమ నియంత్రణ, పాలిష్, చెదల నివారణ వంటి చర్యలు పాటిస్తే ఖరీదైన ఫర్నిచర్ ఏళ్ల తరబడి కొత్తదనంతో మెరిసిపోతుంది. చిన్న నిర్లక్ష్యం పెద్ద నష్టానికి దారితీయవచ్చు. అందువల్ల ఈ వర్షాకాలంలో మీ ఇంటి చెక్క ఫర్నిచర్‌ను ఈ జాగ్రత్తలతో సంరక్షించుకోండి.