కో-లివింగ్‌.. హైదరాబాద్‌లో  కొత్త రెంటల్‌ మోడల్‌

హైదరాబాద్‌లో కో-లివింగ్‌కు పెరుగుతున్న డిమాండ్‌
అద్దె ఇంటికి ప్రత్యామ్నాయంగా కొత్త లైఫ్‌స్టైల్‌
ఐటీ కారిడార్‌లో వేగంగా విస్తరణ
హైటెక్‌ సిటీ-మాదాపూర్‌-గచ్చిబౌలిపై ఫోకస్‌

కొండాపూర్‌-నానక్‌రామ్‌గూడలోనూ పెరుగుతున్న ఆదరణ
సింగిల్‌, డబుల్‌, ట్రిపుల్‌ షేరింగ్‌ ఆప్షన్లు
రూ.10 వేల నుంచి రూ.30 వేలకుపైగా నెలవారీ అద్దెలు
ఫర్నిష్డ్‌ రూమ్‌.. వైఫై.. హౌస్‌కీపింగ్‌.. సెక్యూరిటీ

ప్రీమియం కేంద్రాల్లో జిమ్‌, గేమింగ్‌, కో-వర్కింగ్‌
బ్యాచిలర్స్‌తో పాటు యువ దంపతులకూ ఆకర్షణ
ఐటీ ఉద్యోగ కేంద్రాల చుట్టూ కో-లివింగ్‌ హబ్‌లు
హైదరాబాద్‌ రియల్‌ ఎస్టేట్‌కు కొత్త బిజినెస్‌ మోడల్‌

హైదరాబాద్‌ రియల్‌ ఎస్టేట్‌లో ఇప్పుడు మరో కొత్త ట్రెండ్‌ ఊపందుకుంటోంది. సొంత ఇల్లు కాదు.. సొంతంగా అద్దె ఇల్లు కూడా కాదు.. కో-లివింగ్‌. ఉద్యోగాలు, చదువుల కోసం నగరానికి వచ్చే యువత.. భారీ అడ్వాన్స్‌లు, ఫర్నిచర్‌ ఖర్చులు, ఇంటి నిర్వహణ బాధ్యతలకు దూరంగా.. ఒకే చోట రూమ్‌, ఫుడ్‌, వై-ఫై, హౌస్‌కీపింగ్‌, సెక్యూరిటీ వంటి సౌకర్యాలు లభించే కో-లివింగ్‌ను ఎంచుకుంటున్నారు. ముఖ్యంగా ఐటీ కారిడార్‌లో ఈ ట్రెండ్‌ వేగంగా విస్తరిస్తుండటంతో.. ఇప్పుడు కో-లివింగ్‌ హైదరాబాద్‌ రియల్‌ ఎస్టేట్‌లో ప్రత్యేక రెంటల్‌ మార్కెట్‌గా మారుతోంది.

హైటెక్‌ సిటీ, మాదాపూర్‌, గచ్చిబౌలి, ఫైనాన్షియల్‌ డిస్ట్రిక్ట్‌, కొండాపూర్‌, నానక్‌రామ్‌గూడతో పాటు అమీర్‌పేట్‌, కూకట్‌పల్లి, కేపీహెచ్‌బీ, బేగంపేట్‌ వంటి ప్రాంతాల్లో కో-లివింగ్‌ సెంటర్లు పెరుగుతున్నాయి. ఉద్యోగానికి దగ్గరగా ఉండటంతో పాటు.. ఇంటి నిర్వహణ భారం లేకపోవడం యువతను ఆకర్షిస్తోంది. సింగిల్‌, డబుల్‌, ట్రిపుల్‌ షేరింగ్‌తో పాటు స్టూడియో రూమ్‌లు కూడా అందుబాటులో ఉంటున్నాయి. ప్రాంతం, గది రకం, సౌకర్యాలను బట్టి నెలవారీ అద్దెలు మారుతున్నాయి. సాధారణ షేరింగ్‌ రూమ్‌లకు సుమారు 10 వేల నుంచి 15 వేల వరకు ఉండగా.. ప్రీమియం సింగిల్‌, ఏసీ రూమ్‌లకు 20 వేల నుంచి 30 వేలకుపైగా అద్దె ఉంటోంది. ఇక కో-లివింగ్‌ స్పెషల్‌ ఏంటంటే.. అద్దెతో పాటు చాలా సౌకర్యాలు ఒకే ప్యాకేజీలో లభించడం. ఫర్నిష్డ్‌ రూమ్‌, హైస్పీడ్‌ వై-ఫై, హౌస్‌కీపింగ్‌, లాండ్రీ, సీసీ కెమెరాలు, సెక్యూరిటీతో పాటు ప్రీమియం కేంద్రాల్లో జిమ్‌, గేమింగ్‌ జోన్‌, కో-వర్కింగ్‌ స్పేస్‌, కామన్‌ లాంజ్‌ వంటి సదుపాయాలు కూడా అందిస్తున్నారు.

కో-లివింగ్‌ ప్రభావం ఇప్పుడు రెంటల్‌ మార్కెట్‌తో పాటు ప్రాపర్టీ ఓనర్లపైనా పడుతోంది. ఐటీ ఉద్యోగ కేంద్రాలకు దగ్గరగా ఉన్న అపార్ట్‌మెంట్లు, స్వతంత్ర భవనాలను లీజ్‌కు తీసుకుని కో-లివింగ్‌గా నిర్వహించే ఆపరేటర్లు పెరుగుతున్నారు. ఖాళీగా ఉండే ప్రాపర్టీలను ప్రత్యామ్నాయ రెంటల్‌ మోడల్‌లోకి తీసుకురావడానికి ఇది అవకాశంగా మారుతోంది. కేవలం బ్యాచిలర్స్‌ మాత్రమే కాదు.. నగరానికి కొత్తగా వచ్చిన యువ దంపతులు కూడా కో-లివింగ్‌ వైపు చూస్తున్నారు. ప్రత్యేకంగా ఇల్లు తీసుకుంటే అడ్వాన్స్‌, ఫర్నిచర్‌, గ్యాస్‌, ఇంటర్నెట్‌, నిర్వహణ వంటి అదనపు ఖర్చులు ఉంటాయి. కో-లివింగ్‌లో మాత్రం ఇవన్నీ ఒకే చోట లభించడంతో.. తాత్కాలికంగా హైదరాబాద్‌లో ఉండేవారికి ఇది సౌకర్యవంతమైన ఆప్షన్‌గా మారుతోంది. అయితే కో-లివింగ్‌ అంటే కేవలం ఒక గది, కొన్ని సౌకర్యాలు మాత్రమే కాదు. కమ్యూనిటీ లివింగ్‌ కూడా ఇందులో భాగమవుతోంది. గేమ్‌ నైట్స్‌, ఫిట్‌నెస్‌ సెషన్స్‌, నెట్‌వర్కింగ్‌ ఈవెంట్స్‌, పండుగల వేడుకలతో ఒకే ప్రాంగణంలో ఉండే యువతకు కొత్త పరిచయాలు ఏర్పడుతున్నాయి.

హైదరాబాద్‌లో ఐటీ, గ్లోబల్‌ కంపెనీలు, స్టార్టప్‌లు, విద్యాసంస్థలు విస్తరిస్తున్న కొద్దీ నగరానికి వచ్చే యువ ఉద్యోగులు, విద్యార్థుల సంఖ్య కూడా పెరుగుతోంది. వీరికి సొంత ఇల్లు కొనడం కంటే.. ఉద్యోగానికి దగ్గరగా, ఫర్నిష్డ్‌గా, అన్ని సౌకర్యాలతో కూడిన రెంటల్‌ వసతి ముఖ్యంగా మారుతోంది. అందుకే గచ్చిబౌలి-ఫైనాన్షియల్‌ డిస్ట్రిక్ట్‌, మాదాపూర్‌-హైటెక్‌ సిటీ, కొండాపూర్‌-నానక్‌రామ్‌గూడ, కూకట్‌పల్లి-కేపీహెచ్‌బీ వంటి కారిడార్లలో కో-లివింగ్‌ డిమాండ్‌ మరింత పెరిగే అవకాశం ఉంది. అంటే.. హైదరాబాద్‌ రియల్‌ ఎస్టేట్‌లో మారుతోంది కేవలం ఇళ్ల కొనుగోలు మార్కెట్‌ మాత్రమే కాదు.. రెంటల్‌ మార్కెట్‌ కూడా. కో-లివింగ్‌ ఇప్పుడు నగరంలో కొత్త లైఫ్‌స్టైల్‌ మాత్రమే కాదు.. కొత్త రియల్‌ ఎస్టేట్‌ సెగ్మెంట్‌గా మారుతోంది.