ఫ్రీబీలా.. పేమెంట్‌ ప్లాన్లా?

• పండగ వేళ ఏది బెస్ట్?

పండగ సమయాలను రియల్‌ ఎస్టేట్‌ రంగం సాధారణంగా శుభారంభాలకు అనుకూలమైన సమయంగా భావిస్తుంది. ఈ సందర్భంగా ఇళ్ల కొనుగోళ్లను పెంచేందుకు డెవలపర్లు ప్రత్యేక ఆఫర్లు ప్రకటించడం ఆనవాయితీ. అయితే 2026లో రియల్‌ ఎస్టేట్‌ మార్కెట్‌లో ఆఫర్ల తీరు కొంత మారింది. గతంలో బంగారు నాణేలు, స్టాంప్‌ డ్యూటీ మినహాయింపులు, విదేశీ పర్యటనలు వంటి ఫ్రీబీలతో ఆకర్షించిన డెవలపర్లు.. ఇప్పుడు కొనుగోలుదారులపై ప్రారంభ నగదు భారం తగ్గించేలా ఫ్లెక్సిబుల్‌ పేమెంట్‌ ప్లాన్లను ముందుకు తెస్తున్నారు. ఇంటి కొనుగోలులో తొలిదశలోనే భారీ మొత్తాన్ని చెల్లించాల్సి రావడం చాలామంది కొనుగోలుదారులకు ప్రధాన సమస్య.

దీన్ని దృష్టిలో పెట్టుకుని డెవలపర్లు బయ్ నౌ, పే లేటర్, స్టేగర్డ్ పేమెంట్, డిఫర్డ్ పేమెంట్ వంటి పద్ధతులను అందిస్తున్నారు. అంటే ఇల్లు బుక్‌ చేసుకున్న వెంటనే మొత్తం డబ్బు చెల్లించాల్సిన అవసరం లేకుండా.. ముందుగా కొంత మొత్తం చెల్లించి, మిగిలిన మొత్తాన్ని నిర్ణీత వ్యవధిలో విడతలుగా చెల్లించే అవకాశం కల్పిస్తున్నారు. ఇలాంటి పథకాలతో ఇంటి ధరను తగ్గించకుండానే కొనుగోలుదారుడికి క్యాష్‌ఫ్లో మేనేజ్‌మెంట్‌లో వెసులుబాటు కల్పించవచ్చు. డెవలపర్‌ దృష్టిలోనూ ఇది కీలకమే. ఎందుకంటే ఆస్తి ధరను నేరుగా తగ్గిస్తే ప్రాజెక్టు ధరలపై ప్రభావం పడుతుంది. అదే పేమెంట్‌ షెడ్యూల్‌ను మార్చడం ద్వారా పండుగ సీజన్‌లో కొనుగోలుదారులను ఆకర్షించవచ్చు.

కొనుగోలుదారుడికి ఏది మంచిది?

ఫ్రీబీ కనిపించగానే అది మంచి డీల్‌ అని భావించడం సరికాదని నిపుణుల సూచన. ఉదాహరణకు.. బంగారు నాణెం, ఉచిత పార్కింగ్‌, ఇంటీరియర్‌ ప్యాకేజీ లేదా ఇతర బహుమతుల విలువ కంటే ఇంటి మొత్తం ధర, చెల్లింపు షెడ్యూల్‌, రుణంపై వడ్డీ భారం ముఖ్యమైనవి. ఒకవేళ రూ.కోటి విలువైన ఇంటిపై డెవలపర్‌ రూ.5 లక్షల విలువైన ఫ్రీబీ ఇస్తున్నా.. అదే సమయంలో మార్కెట్‌ ధర కంటే ప్రాపర్టీ ధర ఎక్కువగా ఉంటే కొనుగోలుదారుడికి అసలు ప్రయోజనం ఉండకపోవచ్చు. మరోవైపు అదే ధరకు పేమెంట్‌ గడువును పొడిగిస్తే, ప్రారంభంలో భారీ మొత్తాన్ని సమకూర్చాల్సిన అవసరం తగ్గుతుంది.

‘బయ్ నౌ.. పే లేటర్‌’లో జాగ్రత్త అవసరం

బయ్ నౌ పే లేటర్ లేదా డిఫర్డ్‌ పేమెంట్‌ ప్లాన్‌ అంటే ఉచితంగా అదనపు సమయం లభిస్తుందని భావించకూడదు. ఎప్పుడు ఎంత చెల్లించాలి, ఆలస్యమైతే పెనాల్టీ ఎంత, బ్యాంకు రుణం మంజూరులో జాప్యం జరిగితే పరిస్థితి ఏమిటి, నిర్మాణ దశలతో చెల్లింపులు ఎలా అనుసంధానమై ఉంటాయి వంటి అంశాలను ఒప్పందంలో స్పష్టంగా పరిశీలించాలి. పండుగ ఆఫర్‌ పేరుతో బుకింగ్‌ చేసే ముందు కొనుగోలుదారులు కార్పెట్‌ ఏరియా, బేసిక్‌ సేల్‌ ప్రైస్‌, జీఎస్టీ, రిజిస్ట్రేషన్‌, స్టాంప్‌ డ్యూటీ, పార్కింగ్‌, క్లబ్‌ హౌస్‌, మెయింటెనెన్స్‌, ఇతర ఛార్జీలు కలిపి మొత్తం ఖర్చును లెక్కించాలి.

అలాగే రెరా రిజిస్ట్రేషన్‌, ప్రాజెక్టు అనుమతులు, నిర్మాణ పురోగతి, డెలివరీ తేదీ, డెవలపర్‌ గత ప్రాజెక్టుల రికార్డును పరిశీలించడం కూడా అవసరం. ఫ్రీబీ కంటే ఇంటి నాణ్యత, లొకేషన్‌, కనెక్టివిటీ, ధర, డెవలపర్‌ విశ్వసనీయత ముఖ్యమైనవి. అంటే.. “ఇంత తగ్గిస్తాం” అనే ఆఫర్‌ నుంచి “ఇంత సులభంగా చెల్లించండి” అనే ఆఫర్‌కు రియల్‌ ఎస్టేట్‌ మార్కెట్‌ మారుతోంది. ఇంటి కొనుగోలు వంటి భారీ పెట్టుబడిలో ఇది కొనుగోలుదారులకు ప్రయోజనకరంగా ఉండొచ్చు. అయితే పేమెంట్‌ ప్లాన్‌ నిజంగా వడ్డీ, ఇతర ఛార్జీలతో కలిపి ఎంత భారం కలిగిస్తుందో లెక్కించిన తర్వాతే నిర్ణయం తీసుకోవాలి.