గోవాలో డీఎల్‌ఎఫ్‌ మాల్‌.. 64 శాతం లీజింగ్‌ పూర్తి

గోవాలో డీఎల్‌ఎఫ్‌ నిర్మిస్తున్న కొత్త మాల్‌ ప్రారంభానికి సిద్ధమవుతోంది. ఇప్పటికే మాల్‌లో 64 శాతం ప్రాంతం లీజింగ్‌ పూర్తయిందని డీఎల్‌ఎఫ్‌ రెంటల్‌ బిజినెస్‌ వైస్‌ చైర్మన్‌, మేనేజింగ్‌ డైరెక్టర్‌ శ్రీరామ్‌ ఖట్టర్‌ తెలిపారు. రానున్న ఆరు నుంచి ఎనిమిది వారాల్లో లీజింగ్‌ను 85–90 శాతానికి పెంచాలని కంపెనీ లక్ష్యంగా పెట్టుకుంది. ఈ ఏడాది చివర్లో లేదా 2027 ప్రారంభంలో మాల్‌ను ప్రారంభించే అవకాశం ఉందని ఆయన వెల్లడించారు. మాల్‌కు ఇప్పటికే ఆక్యుపేషన్‌ సర్టిఫికెట్‌ (ఓసీ) లభించింది. ప్రస్తుతం ప్రాజెక్టులో తుది దశ పనులు, ఫినిషింగ్‌ వర్క్స్‌ కొనసాగుతున్నాయి.

మాల్‌ ప్రారంభానికి ముందే వీటిని పూర్తి చేయడంతో పాటు, మరిన్ని ప్రముఖ బ్రాండ్లను అందులోకి తీసుకురావడంపై డీఎల్‌ఎఫ్‌ దృష్టి పెట్టింది. ఈ మాల్‌ నుంచి చదరపు అడుగుకు సగటున రూ.170–175 వరకు అద్దె ఆదాయం వస్తుందని డీఎల్‌ఎఫ్‌ అంచనా వేస్తోంది. మాల్‌లోని వివిధ రకాల రిటైల్‌ స్పేస్‌లకు అద్దె రేట్లు భిన్నంగా ఉండొచ్చని, మొత్తం ప్రాజెక్టు సగటు ప్రాతిపదికన ఈ అంచనాను రూపొందించినట్లు కంపెనీ తెలిపింది. గోవా దేశీయ, అంతర్జాతీయ పర్యాటకులకు ప్రముఖ గమ్యస్థానం. దీంతో స్థానిక జనాభాతో పాటు పర్యాటకుల నుంచి కూడా రిటైల్‌, వినోదం, ఆహారం, లైఫ్‌స్టైల్‌ బ్రాండ్లకు డిమాండ్‌ ఉంటుంది. ఈ నేపథ్యంలో డీఎల్‌ఎఫ్‌ మాల్‌ గోవా రిటైల్‌ మార్కెట్‌లో మరో కీలక ప్రీమియం షాపింగ్‌ డెస్టినేషన్‌గా మారే అవకాశం ఉంది.