సైబరాబాద్‌లో 800కు పైగా అక్రమ నిర్మాణాలు

• కూకట్‌పల్లిలోనే అత్యధికం

సైబరాబాద్‌ మున్సిపల్‌ కార్పొరేషన్‌ (సీఎంసీ) పరిధిలో అక్రమ నిర్మాణాలపై అధికారులు కొరడా ఝళిపిస్తున్నారు. గత ఏడాది కాలంలో మూడు జోన్ల పరిధిలో 800కు పైగా అనుమతి లేని నిర్మాణాలను గుర్తించారు. వీటిలో అత్యధికంగా కూకట్‌పల్లి జోన్‌లో 365 నిర్మాణాలు ఉన్నట్లు వెల్లడించారు. ఇటీవల ఏడు అంతస్తుల భవనం కూలిన ఘటన నేపథ్యంలో అక్రమ నిర్మాణాలపై ఈ వివరాలు వెలుగులోకి రావడం ప్రాధాన్యం సంతరించుకుంది. సీఎంసీ గుర్తించిన 800కు పైగా నిర్మాణాల్లో కూకట్‌పల్లి జోన్‌లో 365, కుత్బుల్లాపూర్‌లో 224, శేరిలింగంపల్లిలో 195 ఉన్నాయి. అక్రమ నిర్మాణాల విషయంలో కూకట్‌పల్లి మొదటి స్థానంలో ఉండగా, కుత్బుల్లాపూర్‌, శేరిలింగంపల్లి తర్వాతి స్థానాల్లో ఉన్నాయి.

అధికారులు గుర్తించిన అన్ని కేసుల్లోనూ చర్యలు ప్రారంభించినట్లు ఓ సీనియర్‌ అధికారి తెలిపారు. అక్రమ నిర్మాణాలను క్రమబద్ధీకరించడం కంటే భౌతికంగా తొలగించడానికే ప్రాధాన్యం ఇస్తున్నామని స్పష్టం చేశారు. శేరిలింగంపల్లి జోన్‌లో 195 అక్రమ నిర్మాణాలను గుర్తించడంతో పాటు 134 షోకాజ్‌ నోటీసులు, 107 స్పీకింగ్‌ ఆర్డర్లు జారీ చేశారు. 28 నిర్మాణాలను కూల్చివేయగా, 55 భవనాలను సీజ్‌ చేశారు. మొత్తంగా 83 ఎన్‌ఫోర్స్‌మెంట్‌ చర్యలు చేపట్టారు. కుత్బుల్లాపూర్‌లో గుర్తించిన మొత్తం 224 కేసుల్లోనూ నోటీసులు జారీ చేయగా, 48 నిర్మాణాలను కూల్చివేయడం లేదా సీజ్‌ చేశారు. కూకట్‌పల్లిలో గుర్తించిన 365 అక్రమ నిర్మాణాలపైనా చర్యలు ప్రారంభించినట్లు అధికారులు తెలిపారు.

చర్యలు ఇలా..

అనుమతి లేని నిర్మాణాన్ని గుర్తించిన తర్వాత అధికారులు ముందుగా షోకాజ్‌ నోటీసు జారీ చేస్తారు. అనంతరం వివరణను పరిశీలించి స్పీకింగ్‌ ఆర్డర్‌ ఇస్తారు. ఉల్లంఘన నిర్ధారణై, నిర్మాణాన్ని క్రమబద్ధీకరించకపోతే కూల్చివేత లేదా సీజ్‌ వంటి చర్యలు చేపడతారు. భవన నిర్మాణ అనుమతులను తప్పించుకునేందుకు కొందరు యజమానులు పలు మార్గాలను అనుసరిస్తున్నట్లు అధికారులు చెబుతున్నారు.

ఉదాహరణకు G+1 భవనానికి అనుమతి తీసుకుని ఆ తర్వాత అదనపు అంతస్తులు నిర్మించడం, చర్యలను అడ్డుకునేందుకు కోర్టులను ఆశ్రయించడం వంటి ఘటనలు ఉన్నట్లు పేర్కొన్నారు. మరోవైపు పాత భవనాలకు కేటాయించిన హౌస్‌ నంబర్లను ఉపయోగించి కొత్తగా నిర్మించిన అక్రమ భవనాలకు విద్యుత్‌, నీటి కనెక్షన్లు పొందుతున్న ఘటనలు కూడా ఉన్నట్లు అధికారులు గుర్తించారు. కొన్ని సందర్భాల్లో యుటిలిటీ సిబ్బందితో కుమ్మక్కై ఇలాంటి కనెక్షన్లు పొందుతున్నారనే ఆరోపణలు ఉన్నాయని అధికారులు తెలిపారు.

ప్రజలకూ ఫిర్యాదు చేసే అవకాశం

తమ పరిసరాల్లో అనుమతి లేని నిర్మాణాలు జరుగుతున్నట్లు గుర్తిస్తే ప్రజలు My CURE యాప్‌ లేదా సమీపంలోని సీఎంసీ సర్కిల్‌ కార్యాలయం ద్వారా ఫిర్యాదు చేయాలని అధికారులు సూచించారు. ఫిర్యాదులను పరిశీలించి నిర్ణీత గడువులో చర్యలు తీసుకుంటామని తెలిపారు.